"Sun Fun" flóamarkaður í Skerjó

13. maí sl. var haldinn "Sun Fun" flóamarkaður við Bauganes 3a. Aðstandendur markaðarins (mest ungar fallegar konur) voru sérlega heppnir með veðrið og fjöldi fólks lagði leið sína á markaðinn og gerðu margir reifarakaup. Frúin í Bauganesi 8 keypti sér t.d. afar fallegan grænan sumarkjól á aðeins 500 krónur og minnkaskinn um hálsinn á þúsund kall, sem sölukonan sagði að tilheyrt hefði ömmu sinni :) Ungur drengur í Bauganesi 6 eignaðist nýja íþróttaskó og ein gekk á brott með hárkollu í hendinni og bros á vor. Ungu konurnar eru hér með hvattar til að endurtaka Sun Fun reglulega.

Sjá fleiri myndir hér.

p.s. Vinsamlegast takið þátt í könnuninni hér til vinstri um hvenær í sumar helst ætti að halda Skerjafjarðarhátíðina. Jens, ritstjóri Skerjafjordur.IS.

Fundargerð aðalfundar Prýðifélagsins Skjaldar

Miðvikudaginn 3. mars 2010

kl.: 17:00 í safnaðarheimili Neskirkju

Dagskrá:

1. Skýrsla formanns

2. Reikningar

3. Kosning stjórnar

4. Umræður um áherslur í starfi stjórnar

5. Önnur mál

Fundarstjóri, Ásdís Káradóttir, setur fundinn og gefur Eggerti Hjartarsyni formanni orðið.

1.     Skýrsla formanns. Stjórnin átti fund um samgöngumál með hverfisráði Vestur­bæjar í nóvember sl. og lagði þar m.a. fram tillögur um betri tengingu almennings­vagna milli Skerjafjarðar og Vesturbæjar. Uppbygging „græna svæðis­ins" milli Bauganess og Skildinganess sem fjölskyldusvæðis er verðugt verkefni, auk hugmynda um að íbúar fóstri leikvelli hverfisins. Sumarhátíðin var haldin í góðu veðri í ágúst og mæltist fjölbreytt dagskráin vel fyrir. Síðasta áramótabrenna og blysför voru fjölmennari en nokkru sinni fyrr og fóru fram í blíðskaparveðri og með sama fyrirkomulagi og árið áður. Verðlaun voru veitt í annað sinn fyrir best skreytta hús og lóð í hverfinu. Stjórnin fundaði að jafnaði einu sinni mánuði síðasta ár. Pétri Marteinssyni hjá Framfarafélagi Vesturbæjar var boðið að sitja einn fund með stjórninni þar sem rætt var um hugsanlega samvinnu.

2.     Reikningar. Ásdís Káradóttir gjaldkeri fór yfir reikninga félagsins. Aðalfundur var ekki haldinn á réttum tíma samkvæmt lögum félagsins og síðasta „reiknings­ár" nær því frá aðalfundi 21. nóvember 2008 til 1. mars 2010. Fjárhagsstaða félagsins er góð en sjóður þess rýrnaði þó milli áranna 2008 og 2009. Munar þar mestu um að ekki var sótt um styrki til Reykjavíkurborgar og Landsbankans líkt og fyrri ár. Reikningar félagsins voru bornir upp til samþykktar og samþykktir af öllum viðstöddum.

3.     Kosning stjórnar. Kjósa skal 5 aðalmenn og 2 varamenn í stjórn samkvæmt lög­um félagsins. Í núverndi stjórn hætta Sigrún Kaya Eyfjörð, Ásdís Káradóttir og Harpa Stefánsdóttir en áfram sitja Ottó Eðvarð og Eggert Hjartarson. Efemía M. Guð­mundsdóttir í varastjórn tekur sæti í stjórn. Því er kosið um tvo nýja stjórnar­menn og einn varamann en Fannar Birgir Jónsson situr áfram sem varamaður. Eftir­taldir íbúar gefa kost á sér í stjórn og eru einróma kjörin: Björg Kjartansdóttir, Hildur Arna Hjartardóttir og Jens Pétur Jensen. Í nýrri stjórn Prýðifélagsins sitja:

Eggert Claude Hjartarson, Reynisnesi

Björg Kjartansdóttir, Fáfnisnesi 14

Efemía M. Guðmundsdóttir, Einarsnesi 44a

Hildur Arna Hjartardóttir, Bauganesi 29a

Ottó Eðvarð, Baugnesi 25a

 

Varamenn eru:

Fannar birgir Jónsson, Bauganesi 31

Jens Pétur Jensen, Bauganesi 8

 

4.     Umræður um áherslur í starfi stjórnar. Rætt um að leggja áfram áherslu á sam­göngu­mál, stuðla að uppbyggingu opinna svæða og styrkja íþróttaiðkun barna í hverfinu.

5.     Önnur mál. Ásdís upplýsir að þar sem opinn íbúafundur um íþrótta- og tóm­stundamál sé haldinn á sama tíma í Frostaskjóli hafi stjórnin afhent fundarstjóra þess fundar ályktun sína um samgöngumál og farið fram á að hún yrði lesin upp þar.

Fleira var ekki gert og fundi slitið kl. 17:50.

skerjafjordur

skjoldur2010

Aðalfundur miðvikudaginn 3. mars nk.

Stjórn Prýðifélagsins Skjaldar boðar til aðalfundar félagsins miðvikudaginn 3. mars kl. 17:00 í safnaðarheimili Neskirkju.

Dagskrá

1. Skýrsla formanns um starf stjórnar

2. Reikningar

3. Kosning stjórnar

4. Umræður um áherslur í starfi næsta árs

5. Önnur mál

Allir íbúar Skerjafjarðar eru hvattir til að mæta á aðalfundinn og hafa þannig áhrif á hverfið okkar - umhverfið í kring, umferðarmálin, hverfishátíðirnar, félagslífið og allt hitt sem gerir gott hverfi enn betra. Við skorum á þá sem hafa áhuga á að starfa fyrir félagið að bjóða sig fram. Heitt verður á könnunni.

 
Verið  velkomin - hlökkum til að sjá ykkur,

stjórnin