Fundargerð stjórnar 4. maí

Stjórnarfundur Prýðifélagsins Skjaldar
Þriðjudaginn 4. maí 2009
kl.: 20:30 hjá Ásdísi

Mætt: Ásdís, Harpa, Ottó, Fannar og Kaya

1. Græna svæðið. Ljúka þarf vinnu við þarfagreiningu græna svæðisins milli Bauganess og Skildinganess. Eggert tekur að sér að finna fyrsta mögulega fundartíma með Sigríði Rögnu Sigurðardóttur sem situr í hverfisráði Vesturbæjar. Stjórnin ræðir við hana um hvaða rétt og úrræði hverfið á tilkall til varðandi framkvæmdir á græna svæðinu. Tillaga stjórnar að þarfagreiningu og vísir að kostnaðaráætlun þyrftu að vera tilbúin fyrir fundinn. Stjórnarmeðlimir eru sammála um að svæðið skuli hafa fjölbreytt notagildi fyrir alla aldurshópa allan ársins hring. Ottó tekur að sér að taka myndir á sambærilegum svæðum til viðmiðunar. Eftirfarandi hugmyndir hafa komið fram:

• - Tenging milli Skógarrólós og græna svæðisins, t.d. göngustígur og bogabrú.
• - Malbikaður og upplýstur göngustígur milli Bauganess og Skildinganess.
• - Lágir veggir sem mynda útlínur lítils húss með borðum og stólum fyrir börnin.
• - Trébekkir með áföstum borðum fyrir börn og fullorðna.
• - Svæði til að tjalda veislutjaldi hverfishátíðarinnar.
• - Hlaðið útikolagrill fyrir sumarhátíð og fleiri viðburði.
• - Hóll til að brjóta svæðið upp og nýta sem sleðabrekku á veturna.
• - Stór steypt rör í kross fyrir börnin að skríða í gegnum.
• - Staður fyrir upplýst jólatré.
• - Staður fyrir flaggstöng.
• - Aðgengi að rafmagni, t.d. fyrir hoppkastala, lýsingu í jólatré o.fl.
• - Leikfimistæki úr tré fyrir börn og fullorðna, líkt og í Öskjuhlíðinni.

2. Drög að loftlagsmálum. Eygerður Margrétardóttir, framkvæmdastýra Staðardagskrár 21 hjá Reykjavíkurborg, sendi stjórninni ósk um umsögn um aðgerðaráætlun í loftlags- og loftgæðamálum Reykjavíkurborgar. Umsögn var send 31. mars sl. (sjá fskj. neðst í færslunni).

3. Ruslagámur. Ottó ber upp tillögu um að settur verði upp ruslagámur í hverfið undir garðúrgang íbúa, t.d. eina helgi í maí. Hann tekur að sér að ræða málið við umsjónarmenn á Hverfastöðinni við Njarðargötu.

4. Önnur mál

Bréf frá Öryggismiðstöðinni. Stjórninni barst tölvuskeyti frá Auði Lilju Davíðsdóttur, starfsmanni Öryggismiðstöðvar Íslands, þar sem hún óskar eftir fundi með stjórninni til að ræða öryggismál íbúa Skerjafjarðar. Ásdís hefur samband við Auði Lilju og kallar eftir nánari útskýringum.

Sumarhátíðin. Ákveðið að halda sumarhátíð Skerjafjarðar 20. júní nk. og hefja undirbúning og skipulagningu hið fyrsta.

Jónuróló. Dregist hefur að koma upp merki á leikvellinum. Eggert sér um að koma því í kring svo fljótt sem verða má.

5. Næsti fundur verður hjá Kayu 26. maí kl. 20:30.

Fleira var ekki gert og fundi slitið kl. 22:15.

Skrár tengdar þessari bloggfærslu:

• Umsögn um loftslagsmál

Hrátt egg og sykurmoli - þáttur um Bauganes

Í þætti Jökuls Jakobssonar, Gatan mín, á Rás 1 laugardaginn 7. febrúar (og aftur 10. febrúar) sagði Jónas Jónasson dagskrárfulltrúi frá Baugsvegi (sem nú heitir Bauganes) þar sem hann ólst upp. Þátturinn var áður fluttur í útvarpi 26. júlí 1970.
 
Jónas segir frá húsunum við Baugsveg og segir sögur af íbúunum þeirra, frá búinu að Reynisstöðum, flugvellinum, stríðsárunum í Skerjafirði og strákapörum drengjanna í hverfinu. Þegar þeir voru uppteknir að leika sér í fjörunni og gáfu sér ekki tíma til að fara heim í hádegismat stálust þeir stundum í hrá egg úr hæsnahúsi móður Jónasar og átu sykurmola með. Hægt er að hlusta á þáttinn á vef RÚV til 24. febrúar

Hreinsunar- og fegrunardagur í Vesturbæ

Hverfisráð Vesturbæjar stendur fyrir hreinsunar og fegrunardegi laugardaginn 17. janúar næstkomandi milli kl. 10:30 og 13:00.

Prýðifélagið Skjöldur hvetur Skerfirðinga til að taka til hendinni. Í Skerjafirði verður hægt að fá afhenta ruslapoka við Skerjaver. Aðrir afhendingarstaðir eru við Vesturgarð, KR og á Landakotstúni.

Hverfisráðið hefur fengið til liðs við sig skátaflokk úr Ægisbúum og eru íbúar Vesturbæjar hvattir til að mæta og taka þátt í þessu uppbyggilega verkefni og stuðla þannig að hreinni og fegurri Vesturbæ. Bent er á að þeir sem ekki hafa tök á að mæta á þessum tíma er upplagt að taka til hendinni í nærumhverfi sínu eða sinni götu. Hverfisráðið vill minna á með verkefni þessu að hver og einn ber ábyrgð á umhverfi sínu og stuðla almennt að betri umgengni.